సీపీఎస్ రద్దు చేసి ఒపిఎస్
పునరుద్ధరించాలి

రెండవ పీఆర్సీ ప్రకటించాలి

పెండింగ్ డీఏలు వెంటనే విడుదల చేయాలి

మహాతెలంగాణ/ మహబూబాబాద్:

ఉద్యోగుల పదవీ విరమణ అనంతర జీవితానికి ఆర్థిక భద్రత కల్పించే పాత పెన్షన్ విధానం పునరుద్ధరించడంతో పాటు, CPSను తక్షణమే రద్దు చేయాలని డిమాండ్ చేస్తూ రాష్ట్ర టీజీఇజాక్ పిలుపు మేరకు మహబూబాబాద్‌లో ఉద్యోగ సంఘాల ఆధ్వర్యంలో మంగళవారం మధ్యాహ్న భోజన విరామ సమయంలో భారీ నిరసన కార్యక్రమం నిర్వహించారు. సెప్టెంబర్ 1వ తేదీని రాష్ట్రవ్యాప్తంగా ‘పెన్షన్ విద్రోహ దినం’గా పాటిస్తూ ఉద్యోగులు నల్లబ్యాడ్జీలు ధరించి నిరసన వ్యక్తం చేశారు.

ఈ సందర్భంగా ఉద్యోగ సంఘాల నాయకులు మాట్లాడుతూ, ఉద్యోగి తన జీవితంలో అత్యంత విలువైన కాలాన్ని ప్రభుత్వ సేవకు అంకితం చేసి, ప్రజలకు సేవ చేసిన అనంతరం పదవీ విరమణ పొందే సమయంలో అతని కుటుంబ భవిష్యత్తుకు ఆర్థిక భద్రత కల్పించాల్సిన బాధ్యత ప్రభుత్వంపై ఉందన్నారు. అయితే CPS విధానం కారణంగా పదవీ విరమణ అనంతరం ఉద్యోగులకు స్థిరమైన ఆర్థిక భద్రతపై అనిశ్చితి ఏర్పడుతోందని ఆవేదన వ్యక్తం చేశారు.

ఒపిఎస్ పునరుద్ధరణే ఉద్యోగుల ప్రధాన డిమాండ్ – టీజీఇజాక్ చైర్మన్ వడ్డెబోయిన శ్రీనివాస్

టీజీఇజాక్ చైర్మన్ వడ్డెబోయిన శ్రీనివాస్ మాట్లాడుతూ, ఉద్యోగులు తమ జీవితంలో అత్యంత విలువైన సంవత్సరాలను ప్రభుత్వ సేవకు అంకితం చేస్తున్నారని, అలాంటి ఉద్యోగులకు పదవీ విరమణ అనంతరం గౌరవప్రదమైన, భద్రమైన జీవితం కల్పించేందుకు ఒపిఎస్ ఎంతో కీలకమన్నారు. సీపీఎస్ విధానం ఉద్యోగుల్లో భవిష్యత్తుపై ఆందోళనకు కారణమవుతోందని తెలిపారు.

ఉద్యోగుల పెన్షన్ భద్రత విషయంలో ప్రభుత్వం స్పష్టమైన నిర్ణయం తీసుకుని సీపీఎస్ ను రద్దు చేసి పాత పెన్షన్ విధానం OPSను పునరుద్ధరించాలని డిమాండ్ చేశారు. ఉద్యోగుల న్యాయమైన డిమాండ్లను పరిష్కరించకుండా నిర్లక్ష్యం చేస్తే రాష్ట్ర టీజీఇజాక్ ఆధ్వర్యంలో ఉద్యమాన్ని మరింత ఉధృతం చేస్తామని హెచ్చరించారు.

ఉద్యోగుల సమస్యలపై ప్రభుత్వం తక్షణమే స్పందించాలి – టీజీఇజాక్ కన్వీనర్ మహమ్మద్ రఫీ

టీజీఇజాక్ కన్వీనర్ మహమ్మద్ రఫీ మాట్లాడుతూ, ఉద్యోగుల భవిష్యత్తు భద్రతతో పాటు ప్రస్తుత ఆర్థిక సమస్యలను కూడా ప్రభుత్వం పరిష్కరించాల్సిన అవసరం ఉందన్నారు. CPSను రద్దు చేసి OPSను పునరుద్ధరించడంతో పాటు, ఉద్యోగులకు సంబంధించిన రెండవ పీఆర్సీని వెంటనే ప్రకటించి అమలు చేయాలని కోరారు.

అలాగే ఉద్యోగులకు రావాల్సిన పెండింగ్ డీఏలను తక్షణమే ప్రకటించి విడుదల చేయాలని ప్రభుత్వాన్ని డిమాండ్ చేశారు. ఉద్యోగుల న్యాయమైన డిమాండ్లను పరిష్కరించడంలో ప్రభుత్వం ఆలస్యం చేయకుండా సానుకూలంగా స్పందించాలని కోరారు. ఉద్యోగుల సమస్యల పరిష్కారం కోసం అన్ని ఉద్యోగ సంఘాలు ఐక్యంగా ముందుకు సాగాలని పిలుపునిచ్చారు.

ఈ సందర్భంగా వివిధ ఉద్యోగ సంఘాల నాయకులు మాట్లాడుతూ… పెన్షన్ అనేది ఉద్యోగి భవిష్యత్తుకు భద్రత మాత్రమే కాకుండా, జీవితాంతం ప్రభుత్వ సేవ చేసిన ఉద్యోగికి లభించాల్సిన సామాజిక భద్రత అని పేర్కొన్నారు. ఉద్యోగి పదవీ విరమణ అనంతరం తన కుటుంబ అవసరాలు, పిల్లల బాధ్యతలు, వృద్ధాప్య జీవితం వంటి అంశాలను దృష్టిలో ఉంచుకుని పెన్షన్ వ్యవస్థను బలోపేతం చేయాల్సిన అవసరం ఉందన్నారు. సీపీఎస్ లో కొనసాగుతున్న ఉద్యోగులకు భవిష్యత్తులో ఎదురయ్యే ఆర్థిక అనిశ్చితిపై ప్రభుత్వం దృష్టి సారించాలని, ఉద్యోగుల ఆందోళనలను అర్థం చేసుకుని OPS పునరుద్ధరణపై తక్షణ నిర్ణయం తీసుకోవాలని కోరారు. అలాగే రాష్ట్రంలోని ఉద్యోగులు, ఉపాధ్యాయులు, పెన్షనర్లు ఎదుర్కొంటున్న సమస్యలను పరిష్కరించేందుకు ప్రభుత్వం సమగ్ర చర్యలు చేపట్టాలని అన్నారు. రెండవ పీఆర్సీని వెంటనే ప్రకటించి అమలు చేయడం, పెండింగ్ డీఏలను విడుదల చేయడం, ఉద్యోగులకు రావాల్సిన ఇతర ఆర్థిక ప్రయోజనాలను సకాలంలో అందించడం ద్వారా ఉద్యోగుల్లో విశ్వాసాన్ని పెంపొందించాలని ప్రభుత్వాన్ని కోరారు. ప్రభుత్వం ఉద్యోగుల సమస్యలపై సానుకూలంగా స్పందించకపోతే, రాష్ట్ర TGEJAC పిలుపు మేరకు భవిష్యత్తులో చేపట్టే అన్ని కార్యక్రమాలను విజయవంతం చేసేందుకు ఉద్యోగ సంఘాలు ఐక్యంగా పనిచేస్తాయని నాయకులు స్పష్టం చేశారు. ఉద్యోగుల ఐక్యతతో ఉద్యమాన్ని మరింత బలోపేతం చేస్తాం. ఉద్యోగుల భవిష్యత్తు భద్రత, పెన్షన్ హక్కు, న్యాయమైన ఆర్థిక ప్రయోజనాల సాధన కోసం చేపట్టిన ఈ ఉద్యమాన్ని ఉద్యోగులు ఐక్యంగా ముందుకు తీసుకెళ్తారని నాయకులు తెలిపారు. CPS రద్దు – OPS పునరుద్ధరణ, రెండవ పీఆర్సీ అమలు, పెండింగ్ డీఏల విడుదల వంటి ప్రధాన డిమాండ్ల సాధన కోసం అవసరమైనంత వరకు ప్రజాస్వామ్య పద్ధతిలో ఉద్యమాన్ని కొనసాగిస్తామని స్పష్టం చేశారు. ఈ కార్యక్రమంలో ఎ. మురళీకృష్ణ, మహమ్మద్ ఫెరోజ్ బి. రమేష్, వేల్పుల శ్రీనివాస్, మైస రోహిత్ , జి. ప్రసాద్, లక్ష్మి , బి. వెంకన్న , దేవేందర్ రాజు, మైసా నాగయ్య, వి. సత్యనారాయణ, కిరణ్ సింగ్ తదితర ఉద్యోగ సంఘాల నాయకులు, ఉద్యోగులు పెద్ద సంఖ్యలో పాల్గొన్నారు.